រតនគីរី : ក្រុមប្រជាពលរដ្ឋឲ្យដឹងថា ធនធានធម្មជាតិ ដែលក្នុងនោះមាន ព្រៃឈើ និងរ៉ែងមាសក្រោមដីផងនៅតំបន់កន្ទុយនាគ នៃឧទ្យានជាតិវីរៈជ័យ ក្នុងស្រុកតាវែង ខេត្តរតនគិរី ពេលនេះកំពុងទទួលរងវិនាសសកម្មដ៏មហន្តរាយជាថ្មី ។
តាមសេចក្ដីរាយការណ៍ថា គេបានប្រទះឃើញមនុស្សភាគច្រើន ដែលជាជនជាតិយួន បានបោះតង់ដេកកាប់ព្រៃឈើយ៉ាងរាលដាលទំនងជាយូរខែមកហើយ ដែលដើមឈើទាំងនោះសុទ្ធតែមានមុខកាត់ធំៗ ហើយដឹកជញ្ជូនទាំងយប់ទាំងថ្ងៃ យកទៅទម្លាក់គរនៅតំបន់បរិស្ថានស្ថិតក្នុងភូមិចង ឃុំញ៉ាង ស្រុកអណ្តូងមាស ជាប់ផ្លូវក្រវ៉ាត់ព្រំដែនកម្ពុជា-យួន។
ដូចគ្នាកាលពីសប្តាហ៍មុនក៍មានសេចក្តីរាយការណ៍ឲ្យដឹងផងដែរថា ក្រុមអ្នកជំនាញ និងកម្មករជនជាតិយួនដែលប្រើប្រាស់គ្រឿងចក្រថ្មីៗ ធ្វើរ៉ែមាស នៅតំបន់ខាងលើនៅចំណុចមុំ៣ រុលរហូតដល់ព្រំដីឡាវយ៉ាងគគ្រឹកគ្រគ្រេង ជាមួយការយាមកាមយ៉ាងតឹងរ៉ឹង ប៉ុន្តែពុំមានក្រុមមន្ត្រីស្ថាប័នជំនាញ ជាពិសេសអាជ្ញាធរដឹងឡើយ ។
ការបំផ្លាញនេះត្រូវបានប្រភពអះអាងថា មានស្ថានភាពអាក្រក់ជាងអំឡុងឆ្នាំ២០០៥ដែលលោក ខាំ ខឿន កាន់អំណាចជាចៅហ្វាយខេត្ត ដែលកាលនុះ មានមនុស្សឋាន:តូចៗតែប៉ុន្មាននាក់ ត្រូវបានគេអូស.ក មកតុលាការក្រុងភ្នំពេញឱ្យទទួលទោសពីបទឧក្រិដ្ឋកម្មព្រៃឈើ ។
ទាក់ទងវិនាសកម្មព្រៃឈើខាងលើលោក ផុន ខេមរិន្ទ ប្រធានមន្ទីរបរិស្ថានខេត្តរតនគិរី បានប្រាប់ក្រុមអ្នករាយការណ៍ព័ត៌មានថា លោកសង្ស័យថា ការកាប់នោះធ្វើនៅលើ ផ្ទៃដីរបស់ក្រុមហ៊ុន នុភាព សុភី អ៊ិនវេសមេន ដែលចាប់ផ្តើមដំណើរឈូសឆាយផ្ទៃដីនៅក្នុងឃុំញ៉ាង ស្រុកអណ្តូងមាស ។
យ៉ាងណាក្ដីក្រុមអ្នកភូមិបាននិយាយថា ទំហំនៃវិនាសកម្មដ៏ធំធេងនេះ មិនអាចមន្ត្រីពាក់ព័ន្ធមិនដឹងនោះទេ ប៉ុន្តែពួកគេធ្វើដេកលក់ , ហើយបានអំពាវនាវឲ្យស្ថាប័នថ្នាក់ជាតិដែលមាននាទីទប់ស្កាត់បទល្មើសធនធានធម្មជាតិចាត់ប្រធានការជាបន្ទាន់ និងស្រាវជ្រាវរកបណ្ដាញពាក់ព័ន្ធ យកទៅផ្ដន្ទាទោស ដោយមិនគួរអត់ឱនឲ្យឡើយ ព្រោះនេះជាអំពើក្បត់ផលប្រយោជន៍ជាតិ ក្បត់ជាតិដ៏អាក្រក់ណាស់ ៕
